ਗਿਲਾ

August 2022

ਜੇ ਤੇਰੇ ਯਾਰ ਦਾ ਘਰ ਤੇਰੇ ਰਾਹ ਆਓਂਦਾ ਹੋਵੇ

ਮਾਰ ਕੇ ਸੀਟੀ ਕੰਡਕਟਰ ਵੀ ਲਾਹੁੰਦਾ ਹੋਵੇ

ਫੇਰ ਵੀ ਮਿਲਣੋਂ ਮਨ ਤੇਰਾ ਕਤਰਾਉਂਦਾ ਹੋਵੇ

ਕਿਸ ਮੂੰਹੋਂ ਫਿਰ ਯਾਰ ਕੋਈ ਅਖਵਾਉਂਦਾ ਹੋਵੇ

ਨਾਲ ਸਬੱਬੀਂ ਹੋਵੇ ਮੇਲ ਬੇਗਾਨੇ ਦਾ

ਰਿਸ਼ਤਾ ਜੋ ਮੁਹਤਾਜ ਨਾ ਕਿਸੇ ਜ਼ਮਾਨੇ ਦਾ

ਤੱਕਾਂ ਹੁਣ ਮੈਂ ਕੀਕਣ ਰਾਹ ਰਫ਼ੀਕਾਂ ਦਾ

ਰਫ਼ਤਾ ਰਫ਼ਤਾ ਛੱਡਿਆ ਸੰਗ ਮੁਰੀਦਾਂ ਦਾ

ਸਮਿਆਂ ਦੇ ਨਾਲ ਵਧਣਾ ਘਟਣਾ ਲਾਜ਼ਮ ਹੈ

ਤੋਟ ਮੇਰੇ ਇਸਰਾਰ ਦਾ ਹੀ ਤਾਂ ਨਾਦਮ ਹੈ

ਰਾਹ ਤੇਰੇ ਨੂੰ ਰੋਕ ਕੇ ਜੇ ਮੈਂ ਬਹਿ ਜਾਂਦਾ

ਵਕਤ ਨਹੀਂ ਹੈ ਕੋਲ਼ ਤੇਰੇ ਕਿੰਜ ਕਹਿ ਜਾਂਦਾ

ਓਦਾਂ ਤਾਂ ਛੱਡ ਐਡੀ ਵੀ ਇਹ ਗੱਲ ਨਹੀਂ

ਪਿਆਰ ਸਨੇਹ ਵਿੱਚ ਚਾਲ ਦਾ ਕੋਈ ਚੱਲ ਨਹੀਂ

ਦਿਲ ਹੀ ਤੇਰਾ ਜੇ ਹੁਣ ਸਾਡੇ ਵੱਲ ਨਹੀਂ

ਕਰੀਏ ਕੀਕਣ ਜ਼ਿਦ ਰਿਹਾ ਕੋਈ ਮੱਲ ਨਹੀਂ

ਹੋ ਸਕਦਾ ਤੂੰ ਸੱਚੀ ਮੁੱਚੀ ਰੁੱਝਿਆ ਏਂ

ਵਕਤ ਨਹੀਂ ਤੂੰ ਸੌ ਗੰਢਾਂ ਵਿੱਚ ਗੁੱਝਿਆਂ ਏਂ

ਵਕਤ ਮਿਲੇ ਜਦ ਬੂਹਾ ਤੂੰ ਖੜਕਾ ਦੇਵੀਂ

ਬੇਗਾਨਾ ਨਹੀਂ ਸਾਡਾ ਜਾਣਿਆ ਬੁੱਝਿਆ ਏਂ

***********************

 

ਦੋਸਤਾਨਾ ਰੁੱਕਾ

July 2022

 

ਬਿਜਲੀ ਦੇ ਨਾਲ਼ ਚੱਲਦੀਆਂ ਹੋਵਣ

ਜੇਕਰ ਸਾਰੀਆਂ ਮੋਟਰ ਕਾਰਾਂ

ਕੋਹਾਂ ਲੰਮੀਆਂ ਗਗਨ ਛੂਹਦੀਆਂ

ਪਵਨ ਚੱਕੀਆਂ ਦੀਆਂ ਕਤਾਰਾਂ

ਕੁਝ ਘੰਟੇ ਲਈ ਨ੍ਹੇਰਾ ਕਰਕੇ

ਮੋਮ ਬੱਤੀਆਂ ਹੱਥ 'ਚ ਫੜ ਕੇ

ਫੇਰ ਕੀ ਮੁੜ ਕੇ ਆ ਜਾਵਣਗੀਆਂ

ਵਾਤਾਵਰਣ 'ਚ ਮਸਤ ਬਹਾਰਾਂ

ਕੂੜੇ ਨੂੰ ਰੀਸਾਈਕਲ ਕਰਕੇ

ਯਦਾ ਕਦਾ ਉਪਵਾਸ ਨੂੰ ਧਰਕੇ

ਦੁਨੀਆਂ ਵਿੱਚੋਂ ਭੁੱਖ ਭਜਾਓ

ਟੀ ਸ਼ਰਟਾਂ ਤੇ ਨਾਅਰੇ ਮੜ੍ਹ ਕੇ

ਜਾਂ ਫਿਰ ਸ਼ਹਿਰ ਦੇ ਅੱਧ ਵਿਚਾਲੇ

ਪੱਦ ਯਾਤਰਾ ਜਲਸੇ ਕੱਢਕੇ

ਫੇਰ ਕੀ ਦੁਨੀਆਂ ਦੇ ਵਿਚੋਂ ਇਹ

ਗੁਰਬਤ ਡਰਦੀ ਭੱਜ ਜਾਵੇਗੀ

ਯਾਰ ਮੇਰੇ ਸਭ ਵੱਡੇ ਹੋ ਗਏ

ਕਦ ਦੇ ਦਾਦੇ ਨਾਨੇ ਬਣ ਗਏ

ਪੋਤੇ ਦੋਹਤੇ ਦੀ ਕਿਲਕਾਰੀ

ਕਹਿੰਦੇ ਲੱਗਦੀ ਬੜੀ ਪਿਆਰੀ

ਕੀ ਆਖਣਗੇ ਉਨ੍ਹਾਂ ਨੂੰ ਜਦ

ਨਦੀਆਂ ਨਾਲ਼ਿਆਂ ਜੰਗਲ਼ਾਂ ਪਾਣੀਆਂ

ਦੀ ਉਨ੍ਹਾਂ ਮੰਗੀ ਹੱਕਦਾਰੀ

ਦਾਦਾ ਜੀ ਤੁਸੀਂ ਕੀ ਕਰਦੇ ਸੀ

ਲੁੱਟਿਆ ਗਿਆ ਜਦ ਮੇਰਾ ਮਾਲ

ਦੁਨੀਆਂ ਦਾ ਇਹ ਹਾਲ ਕਿਓਂ ਬਣਿਆ

ਕਿਓਂ ਕੀਤਾ ਨਾਂ ਤੁਸੀਂ ਸਵਾਲ

ਸਰਮਾਇਆ ਮੇਰਾ ਸਭ ਕੁਝ ਡੰਗ ਗਿਆ

ਕਿਓਂ ਨਾ ਕੀਤਾ ਤੁਸੀਂ ਖ਼ਿਆਲ

ਫੇਰ ਤੁਸੀਂ ਕੀ ਸਮਝਾਵੋਂਗੇ

ਪੁੱਤਰਾ ਸਾਨੂੰ ਵਕਤ ਨਹੀਂ ਸੀ

ਤੇਰੀ ਦੁਨੀਆਂ ਕਿਓਂ ਹੈ ਉੱਜੜੀ

ਇਸ ਨਾਲ਼ ਸਾਨੂੰ ਫਰਕ ਨਹੀਂ ਸੀ

ਹਲਚਲ ਥੋਡੇ ਮਨ ਵਿੱਚ ਕਰਦਾ

ਰੱਤਾ ਜੇ ਇਹ ਸਵਾਲ ਜਵਾਬ

ਫ਼ੇਰ ਤਾਂ ਬਾਈ ਪੜ੍ਹਨੀ ਪੈਣੀ

ਲੱਖੇ ਦੱਸੀ ਲਾਲ ਕਿਤਾਬ

ਤੇਰੇ ਦੋਹਤੇ ਪੋਤੇ ਦਾ ਕਿੰਜ

ਹੋਇਆ ਗਹਿਣੇ ਜੀਵਨ ਕਾਲ

ਕੀਕਣ ਹੈ ਸਰਮਾਇਆ ਬਣਦਾ

ਅਲਜਬਰੇ ਦਾ ਨਹੀਂ ਸਵਾਲ

ਵਕਤ ਅਜੇ ਵੀ ਬੜਾ ਹੈ ਬਾਕੀ

ਰਹਿੰਦੀ ਦਾ ਤੁਸੀਂ ਕਰਨਾ ਵੀ ਕੀ

ਜਾਂ ਫ਼ਿਰ ਕਹਿ ਦੋ

ਦੋਹਤੇ ਪੋਤੇ ਦੇ ਨਾਲ ਸਾਨੂੰ

ਗੱਲੀਂ ਗੱਲੀਂ ਪਿਆਰ ਹੈ ਭਾਈ

ਧੂੜ ਚ ਟੱਟੂਆਂ ਦੀ ਨਾ ਜਾਵੋ

ਐਵੇਂ ਬਹਿ ਕੇ ਰੇਲ ਬਣਾਈ

****************

 

ਕਾਰਨ

July 2022

 

ਤੇਰੇ ਹਰ ਇੱਕ ਮਰਜ਼ ਦਾ ਕਾਰਨ ਕੁੱਲ ਮਿਲਾ ਕੇ ਇੱਕ ਹੈ

ਐਸਾ ਇੱਕ ਬਾਜ਼ਾਰ ਹੈ ਜਿਸ ਵਿੱਚ ਜਾਂਦਾ ਸਭ ਕੁਝ ਵਿਕ ਹੈ

ਹਰ ਇੱਕ ਬੋਹੜ ਦੀ ਬੋਲੀ ਲੱਗਣੀ ਉਸ ਦੇ ਵਿੱਚ ਨਿਸ਼ਚਿਤ ਹੈ

ਭੁੱਖਾ ਭਾਣਾ ਸੁੱਕੀਆਂ ਛਾਤੀਆਂ ਬਾਲ ਰਿਹਾ ਇੱਕ ਦੁੱਧ ਨੂੰ ਟੋਲ਼

ਕੂੜੇ ਦੇ ਢੇਰਾਂ ਦੇ ਉੱਤੇ ਮਾਂ ਕਿਸਮਤ ਨੂੰ ਰਹੀ ਫਰੋਲ਼

ਰੋਜ਼ ਮਨੁੱਖ ਦੀ ਕੀਮਤ ਲੱਗਦੀ ਲੇਬਰ ਚੌਕ ਚ ਖੰਭੇ ਕੋਲ਼

ਪਵਨ ਗੁਰੂ ਪਾਣੀ ਪਿਤਾ ਤੇ ਧਰਤੀ ਮਾਂ ਦੂਸ਼ਿਤ ਹੈ

ਕੋਹਾਂ ਤੱਕ ਹੁਣ ਮੀਂਹ ਵਾਲ਼ੇ ਜੰਗਲ਼ ਵਿੱਚ ਨਾ ਕੋਈ ਰੁੱਖ ਹੈ

ਬੇਮੁਹਾਰ ਸਰਮਾਏ ਸਾਹਵੇਂ ਵਾਤਾਵਰਣ ਵੀ ਚਿੱਤ ਹੈ

ਜੰਗਲ਼ ਸਾਗਰ ਅਤੇ ਸਮੁੰਦਰ ਵਿੱਚ ਮੌਤ ਜਿਹੀ ਚੁੱਪ ਹੈ

ਹਰ ਇੱਕ ਜੀਵ ਪੂੰਜੀ ਦੇ ਅੱਗੇ ਝੁਕ ਕੇ ਨੱਤਮਸਤਕ ਹੈ

ਸਭ ਕੁਝ ਜਾਣਦਿਆਂ ਵੀ ਮਾਨਵ ਆਤਮ ਘਾਤ ਚ ਰਤ ਹੈ

ਰਿਸ਼ਤੇ ਨਾਤੇ ਪਿਆਰ ਮੁਹੱਬਤ ਟੁੱਟਦੇ ਜਾਂਦੇ ਜੋ ਹਰ ਰੋਜ਼

ਵਿੱਸਰੇ ਵਕਤ ਜੋ ਕਰ ਦਿੰਦੇ ਹਰ ਦਿਨ ਤੇਰੇ ਦਿਲ ਨੂੰ ਪੁਰਸੋਜ਼

ਪੂੰਜੀ ਹੀ ਲਾਉਂਦੀ ਹੈ ਰਗੜਾ ਮਾਨਵਤਾ ਨੂੰ ਰੋਜ਼ ਬਰੋਜ਼

ਝੂਠਾਂ ਦੀ ਇੱਕ ਗੰਢ ਹੈ ਜਿਸ ਦਾ ਨਾਮ ਤੇਰਾ ਮਜ਼ਹਬ ਹੈ

ਸੋਚ ਤੇਰੀ ਨੂੰ ਖੁੰਢਾ ਕਰਦਾ ਐਸਾ ਨਸ਼ਾ ਗ਼ਜ਼ਬ ਹੈ

ਸਰਮਾਏ ਦਾ ਨੰਗਾ ਤਾਂਡਵ ਹੁੰਦਾ ਹਰ ਰੱਬ ਘਰ ਹੈ

ਤੇਰੇ ਹਰ ਇੱਕ ਦਰਦ ਦਾ ਕਾਰਨ ਕੁੱਲ ਮਿਲਾ ਕੇ ਇੱਕ ਹੈ

ਐਸਾ ਇੱਕ ਬਾਜ਼ਾਰ ਹੈ ਜਿਸ ਵਿੱਚ ਜਾਂਦਾ ਸਭ ਕੁਝ ਵਿਕ ਹੈ

ਹਰ ਸ਼ੈ ਦੀ ਕੀਮਤ ਲੱਗ ਜਾਣਾ ਇਸ ਦੇ ਵਿੱਚ ਨਿਸ਼ਚਿਤ ਹੈ

********************************

 

ਬਾਬਰ

June 2022

ਹਰ ਕੋਈ ਆਪਣੇ ਨ੍ਹੇਰੇ ਦੇ ਵਿੱਚ ਮੌਤ ਦੇ ਵਾਂਗਰ ਚੁੱਪ ਹੈ

ਹੰਕਾਰ ਨੇ ਜੰਮਿਆ ਫੇਰ ਤੋਂ ਜ਼ਾਲਿਮ ਬਾਬਰ ਦਾ ਇੱਕ ਪੁੱਤ ਹੈ

ਕੋਈ ਈਸਾ ਕੋਈ ਮੂਸਾ ਕੋਈ ਸਿੱਖ ਤੇ ਕੋਈ ਸਨਾਤਨ

ਮੁੱਠੀ ਭਰ ਜ਼ਾਲਮ ਦੇ ਗੋਡੀਂ ਇੱਕ ਕਰੋੜ ਖ਼ਲਕਤ ਹੈ

ਢਾਹ ਦੇ ਗਿਰਜ਼ਾ ਜਿਸ ਦੇ ਅੰਦਰ

ਨਿੱਤ ਬਹਿ ਕੇ ਮੈਂ

ਟੱਲ ਵਜਾਵਾਂ ਰਾਮ ਨੂੰ ਹਾਕਾਂ ਲਾਵਾਂ

ਢਾਹ ਦੇ ਓਹ ਮੰਦਿਰ ਜਿਸ ਅੰਦਰ

ਆਸਾਂ ਦਾ ਮੈਂ

ਨਿੱਤ ਤਵੀਤ ਬੰਨ੍ਹਾਵਾਂ

ਢਾਹ ਦੇ ਓਹ ਮਸਜਿਦ ਵੀ ਜਿਸ ਦਰ

ਅਜ਼ਾਨ ਦਾ

ਸ਼ੰਖ ਵਜਾਵਾਂ

ਢਾਹ ਦੇ ਹਰ ਗੁਰ ਦਾ ਓਹ ਦੁਆਰਾ

ਜਿਸ ਅੰਦਰ ਮਜ਼ਲੂਮ ਦੀ ਖਾਤਿਰ

ਸ਼ਿਵ ਤੋਂ ਵਰ ਮੰਗ ਪਾਵਾਂ

ਹੁਣ ਤਾਂ ਮਾਏ ਪਹੁ ਫੁੱਟੇ ਦਾ ਰੱਤੜਾ ਰੰਗ ਲੁਭਾਏ

ਕਾਲ਼ੇ ਪੀਲ਼ੇ ਗੋਰੇ ਭੂਰੇ ਸਭ ਮੇਰੇ ਹਮਸਾਏ

ਵੰਡੀਆਂ ਦਾ ਬੱਦਲ ਕਦ ਤੱਕ ਮੇਰੇ

ਸਿਰ ਉੱਤੇ ਮੰਡਰਾਏ

ਬਦਲੀ ਦਾ ਝੱਖੜ ਹਰ ਇੱਕ ਦਿਨ

ਜ਼ੋਰ ਪਕੜਦਾ ਜਾਏ

ਹਰ ਨਿਕਾਬ ਦੇ ਪਿੱਛੇ ਛੁਪੀ

ਇੱਕ ਇਨਸਾਨ ਦੀ ਧੀ ਹੈ

ਸੜਕ ਦੇ ਉੱਤੇ ਰੋਜ਼ੀ ਮੰਗਦਾ

ਰਾਮ ਰਹੀਮ ਨਹੀਂ ਹੈ

ਧਰਮਾਂ ਦੇ ਕਫ਼ਨਾਂ ਪਸਪਰਦਾ

ਸਰਮਾਏ ਦਾ ਤਾਂਡਵ ਹੈ

ਲੋਕਾਈ ਵਿੱਚ ਵੰਡੀਆਂ ਪਾਵੇ

ਹਾਲ ਦਾ ਉਹ ਜਾਬਰ ਹੈ

ਅੱਜ ਦਾ ਬਾਬਰ ਲਸ਼ਕਰ ਲੈ ਕੇ ਪੱਛਮ ਤੋਂ ਨਹੀਂ ਆਓਂਦਾ

ਅੱਜ ਦਾ ਜਾਬਰ ਸੰਸਦ ਦੇ ਵਿੱਚ ਬਹਿ ਕੇ ਡੇਰਾ ਲਾਉਂਦਾ

ਅੱਜ ਦਾ ਬਾਬਰ ਚਰਖੜੀਆਂ ਦੇ ਉੱਤੇ ਨਹੀਂ ਚੜ੍ਹਾਉਂਦਾ

ਅੱਜ ਦਾ ਜਾਬਰ ਹਰ ਮੱਤ ਭੇਦ ਤੇ ਬੁਲਡੋਜ਼ਰ ਚਲਵਾਓਂਦਾ

**********************************

 

ਹਮੇਸ਼ਾਂ

June 2022

 

ਗਰਦਿਸ਼ ਵਿੱਚ ਤਾਰਿਆਂ

ਇੱਕ ਧੂੜ ਬਣਾਈ

ਜੋ ਨਾਲ਼ ਸਬੱਬੀਂ

ਹੈ ਹੋਸ਼ ਚ ਆਈ

ਤੇਰਾ ਮੇਰਾ

ਰੂਪ ਬਣ ਕੇ

ਦੋ ਘੜੀ ਦੇ ਵਾਸਤੇ

ਜਦ ਦੀ ਤੇਰੀ ਖੁਸ਼ਬੂ

ਵੱਸੀ ਮਨ ਮੇਰੇ

ਤੂੰਹੀਓਂ ਮੇਰੇ ਅੰਦਰ

ਤੂੰਹੀ ਚਾਰ ਚੁਫ਼ੇਰੇ

ਮੇਰੀ ਧੜਕਨ

ਮੇਰੇ ਹਮਦਮ

ਧੜਕਦੀ ਤੇਰੇ ਵਾਸਤੇ

ਕੁਦਰਤ ਦਾ ਜਲਵਾ

ਹਰ ਰੋਜ਼ ਕਰਿਸ਼ਮਾ

ਅਦਭੁਤ ਵਰਤਾਰੇ

ਹਰ ਰੋਜ਼ ਨਜ਼ਾਰੇ

ਸਾਥ ਤੇਰਾ

ਜਦ ਤੋਂ ਮਿਲਿਆ

ਜ਼ਿੰਦਗੀ ਦੇ ਵਾਸਤੇ

ਰਾਹ ਵਿੱਚ ਹੁਣ ਤੇਰੇ

ਰਹੇ ਸੋਚ ਗਵਾਚੀ

ਸਹਿਹੋਂਦ ਦਾ ਜਿਹੜਾ

ਹੁਣ ਵਕਤ ਹੈ ਬਾਕੀ

ਮਿਲ ਕੇ ਦੋਵੇਂ

ਆਜਾ ਚੱਲੀਏ

ਯੁਗ ਯੁਗਾਂ ਦੇ ਵਾਸਤੇ

****************

 

ਉਮੀਦਾਂ

May 2022

 

ਹਰ ਔਰਤ ਦੇ ਅੰਦਰ ਨਜ਼ਰਬੰਦ ਹੈ

ਇੱਕ ਉਮੀਦਾਂ ਜੋ ਅੱਲ੍ਹੜ ਨਿਆਣੀ ਕੁੜੀ

ਉਹ ਜੋ ਉਮਰਾਂ ਤੋਂ ਪਹਿਲਾਂ ਬਿਰਧ ਹੋ ਗਈ

ਲਾਡਲੀ ਮਾਂ ਦੀ ਸੋਹਣੀ ਸਿਆਣੀ ਕੁੜੀ

ਹਰ ਔਰਤ ਦੇ ਅੰਦਰ ਨਜ਼ਰਬੰਦ ਹੈ

ਜਦ ਭੰਗੂੜੇ ਤੋਂ ਉੱਤਰੀ ਸੀ ਉਹ ਬਾਲੜੀ

ਸਾਹਮਣੇ ਘੇਰੀ ਰਸਤਾ ਸੀ ਦੁਨੀਆਂ ਖੜੀ

ਨਨ੍ਹੇ ਕਦਮਾਂ ‘ਚ ਹਰਦਮ ਰਹੇ ਖੜਕਦੀ

ਪੈਰੀਂ ਝਾਂਜਰ ਦੀ ਬੇੜੀ ਇੱਕ ਮੋਤੀ ਜੜੀ

ਇਸ ਤੋਂ ਪਹਿਲਾਂ ਉਮੀਦਾਂ ਸਮਝ ਸੋਚਦੀ

ਉਹ ਇੱਕ ਔਰਤ ਦੇ ਅੰਦਰ ਨਜ਼ਰਬੰਦ ਸੀ

ਬਾਲੜੀ ਇਸ ਤੋਂ ਪਹਿਲਾਂ ਕੋਈ ਜ਼ਿੱਦ ਕਰੇ

ਖੇਡਣਾ ਮੈਂ ਵੀ ਖਿੱਦੋ ਕਹਿ ਰੋਵੇ ਲੜੇ

ਵਾਂਗ ਮੁੰਡਿਆਂ ਦੇ ਕੁੱਦਣਾ ਨਾ ਇਹ ਸਿੱਖ ਲਵੇ

ਕੱਢ ਕੇ ਗੁੱਡੀਆਂ ਪਟੋਲੇ ਮਾਂ ਉਸਨੂੰ ਦਵੇ

ਦੁਨੀਆਂਦਾਰੀ ਦੀ ਮਾਰੀ ਸਿਆਣੀ ਕੁੜੀ

ਆਪਣੇ ਮਾਂ ਪੇ ਦੇ ਘਰ ਵੀ ਬੇਗਾਨੀ ਕੁੜੀ

ਜਿਸ ਉਮਰ ਮੁੰਡੇ ਭੱਜਦੇ ਫਿਰਨ ਖੇਢਦੇ

ਚੁੱਲ੍ਹੇ ਚੌਕੇ ਦੀ ਸਿਖਿਆ ਉਮੀਦਾਂ ਲਵੇ

ਜਦ ਕੋਈ ਕਾਕਾ ਖ਼ਤਰੇ ਚ ਹਿੰਮਤ ਕਰੇ

ਬਾਪ ਦਾ ਸੀਨਾ ਦੂਣਾ ਤੇ ਤੀਣਾ ਵਧੇ

ਤੇ ਉਮੀਦਾਂ ਜੇ ਇੱਕ ਡਿੰਘ ਵੀ ਪੁੱਟ ਲਵੇ

ਮਾਂ ਸਲੀਕੇ ਤੇ ਸਮਝਾਂ ਦੀ ਵਿੱਦਿਆ ਦਵੇ

ਫਿਰ ਉਮੀਦਾਂ ਨੂੰ ਵਰ੍ਹਿਆਂ ਦੇ ਗੇੜੇ ਚੜ੍ਹੇ

ਵੇਖਦੇ ਵੇਖਦੇ ਦਰ ਆ ਤੇਰਾਂ ਖੜ੍ਹੇ

ਛੱਡ ਕੇ ਧਰਤੀ ਨਾ ਅੰਬਰੀਂ ਕਿਤੇ ਉੱਡ ਪਵੇ

ਸਿਰਨ੍ਹਾਉਣੀ ਬਹਾਨੇ ਸ਼ਿਕੰਜੇ ਕਸੇ

ਇਸ ਤੋਂ ਪਹਿਲਾਂ ਕਿ ਉਹ ਇਸ ਨੂੰ ਸ਼ਕਤੀ ਕਹੇ

ਔਰਤਾਂ ਦੀ ਬਿਮਾਰੀ ਦੁਨੀਆਂ ਨਾਉਂ ਦਵੇ

ਰੋਕਿਆਂ ਰੁਕਦੀ ਕਿੱਥੇ ਜੀਵਨ ਦੀ ਲੜੀ

ਫਿਰ ਉਮੀਦਾਂ ਨੂੰ ਜ਼ਾਲਮ ਜਵਾਨੀ ਚੜ੍ਹੀ

ਨਾਮ ਜਿਸ ਦਾ ਨਾ ਚੱਲਣਾ ਕਿਸੇ ਦੇ ਕਦੀ

ਓਹੀ ਸਭਨਾਂ ਦੀ ਇੱਜਤ ਦੇ ਜੁੰਮੇ ਖੜ੍ਹੀ

ਪਹਿਲਾਂ ਵੀਰਾਂ ਦੀ ਅਣਖ ਰਹੀ ਸਾਂਭਦੀ

ਫਿਰ ਬੇਗਾਨੇ ਘਰਾਂ ਦਾ ਅਦਬ ਬਣ ਗਈ

ਇੰਜ ਉਧੇੜੀ ਗਈ ਪੰਖੜੀ ਪੰਖੜੀ

ਹਰ ਉਮੀਦਾਂ ਉਮੀਦਾਂ ਦੀ ਵੇਦੀ ਚੜ੍ਹੀ

ਕਿਓਂ ਉਹ ਔਰਤ ਦੇ ਅੰਦਰ ਨਜ਼ਰਬੰਦ ਹੈ

ਜੇ ਅਜੇ ਵੀ ਹੈ ਅੱਲ੍ਹੜ ਨਿਆਣੀ ਕੁੜੀ

ਕਿਓਂ ਉਮੀਦਾਂ ਬਰੂਹਾਂ ਰਹੇ ਝਾਕਦੀ

ਇਹ ਤਾਂ ਜੱਗ ਦੇ ਨੇ ਖੇਖਣ ਨਾ ਮੁੱਕਣੇ ਕਦੀ

ਜਿਸ ਵੀ ਔਰਤ ਦੇ ਅੰਦਰ ਕੋਈ ਬਾਲੜੀ

ਜੇ ਅਜੇ ਵੀ ਹੋਵੇ ਚੀਕਦੀ ਤੜਪਦੀ

ਉਹ ਜੋ ਔਰਤ ਦੇ ਅੰਦਰ ਨਜ਼ਰਬੰਦ ਹੈ

ਜੋ ਅਜੇ ਵੀ ਹੈ ਅੱਲ੍ਹੜ ਨਿਆਣੀ ਕੁੜੀ

ਇਸ ਤੋਂ ਪਹਿਲਾਂ ਉਮੀਦਾਂ ਜਨਾਜੇ ਚੜ੍ਹੇ

ਤੋੜ ਦੇ ਬੇੜੀਆਂ ਬੰਦਿਸ਼ਾਂ ਇਹ ਸਭੇ

ਉਹ ਉਮੀਦਾਂ ਜੋ ਅੱਲ੍ਹੜ ਨਿਆਣੀ ਕੁੜੀ

ਲਾਡਲੀ ਮਾਂ ਦੀ ਸੋਹਣੀ ਸਿਆਣੀ ਕੁੜੀ

**************************

 

ਪਾਨ ਦੀ ਬੇਗਮ

May 2022

 

ਪਾਨ ਦੀਏ ਬੇਗ਼ਮੇਂ ਹੁਕਮ ਤੇਰਾ ਗੁਲਾਮ ਮੈਂ

ਤੇਰੀਆਂ ਨਜ਼ਾਕਤਾਂ ਨੇ ਕੀਤਾ ਬੇ-ਈਮਾਨ ਮੈਂ

ਗ਼ਜ਼ਬ ਦਾ ਆਬ

ਗ਼ਜ਼ਬ ਦਾ ਆਬ ਤਾਬ ਇਹ ਜੋ ਹੁਸਨ ਤੇ ਸ਼ਬਾਬ ਹੈ

ਲੋੜ੍ਹਿਆਂ ਦਾ ਢਾਹ ਰਿਹਾ ਇਹ ਜ਼ੁਲਮ ਬੇਹਿਸਾਬ ਹੈ

ਮਸਤ ਤੇਰੀ ਚਾਲ ਕਿਹੜੀ ਮੌਜ ਦਾ ਗੁਮਾਨ ਹੈ

ਇਹ ਟਿਕ ਟਿਕਾ 'ਚ ਥਮ੍ਹਿਆ ਤੂੰ ਜਿਸ ਤਰਾਂ ਤੁਫ਼ਾਨ ਹੈ

ਗ਼ਜ਼ਬ ਦਾ ਰੰਗਰੂਪ

ਗ਼ਜ਼ਬ ਦਾ ਰੰਗਰੂਪ ਜੋ ਸੌਗਾਤ ਕਾਇਨਾਤ ਹੈ

ਕਿਸੇ ਹਸੀਨ ਖ਼ਾਬ ਦੀ ਇਹ ਚੌਦ੍ਹਵੀਂ ਦੀ ਰਾਤ ਹੈ

ਚਾੜ੍ਹਿਆ ਇਹ ਬਾਣ ਜੋ ਨਜ਼ਰ ਦਾ ਤੂੰ ਕਮਾਨ ਤੇ

ਬੇਕਸਾਂ ਦੇ ਵੱਜਣਾ ਇਹ ਦਰਮਿਆਨ ਨਿਸ਼ਾਨ ਤੇ

ਗ਼ਜ਼ਬ ਦੀ ਬੇਰੁਖ਼ੀ

ਗ਼ਜ਼ਬ ਦੀ ਬੇਰੁਖ਼ੀ ਮੇਰੇ ਸਬਰ ਦਾ ਇਮਤਿਹਾਨ ਹੈ

ਇਹ ਹੌਲੇ ਹੌਲੇ ਚੜ੍ਹ ਰਹੇ ਖ਼ੁਮਾਰ ਦਾ ਪਿਆਮ ਹੈ

ਤਾਰਿਆਂ ਦਾ ਨੂਰ ਜੋ ਫ਼ਲਕ ਤੇ ਬਿਰਾਜਮਾਨ ਹੈ

ਇਹ ਮੇਰੇ ਮਨ ਦੀ ਕਸ਼ਮਸ਼ ਤੋਂ ਐਨਾ ਕਿਓਂ ਨਾਦਾਨ ਹੈ

ਗ਼ਜ਼ਬ ਦੀ ਇਹ ਕਸ਼ਿਸ਼

ਗ਼ਜ਼ਬ ਦੀ ਇਹ ਕਸ਼ਿਸ਼ ਜੋ ਤੇਰੇ ਮੇਰੇ ਦਰਮਿਆਨ ਹੈ

ਗਰਦਿਸ਼ ਤੇਰੀ 'ਚ ਘੁੱਮਣਾ ਹੀ ਇਸ ਦਾ ਸਮਾਧਾਨ ਹੈ

*****************************

 

ਬੇਦਾਵਾ

April 2022

 

ਵੀਰ ਮੇਰੇ ਤੂੰ ਮੇਰੇ ਲਫ਼ਜ਼ਾਂ ਨੂੰ ਤਸਦੀਕ ਕਰਾ ਲਾ

ਜੋ ਮੈਂ ਕਹਿਨਾ ਉਸਦਾ ਇੱਕ ਪੱਕਾ ਅਸ਼ਟਾਮ ਬਣਾ ਲਾ

ਭਗਵਾ ਝੰਡੇ ਵਾਲ਼ਾ ਜੋ ਅੱਜ ਤੇਰਾ ਮਨ ਭਰਮਾਉਂਦਾ

ਮੈਨੂੰ ਦਿਸਦਾ ਭਲਕੇ ਇਹ ਘਰ ਤੇਰੇ ਆਤਿਸ਼ ਲਾਓਂਦਾ

ਵੇਖ ਜ਼ਰਾ ਤਾਂ ਮੋਢੀ ਹੈ ਜੋ ਉਸ ਦਾ ਕੀ ਹੈ ਖ਼ਾਕਾ

ਮਸਜਿਦ ਦੇ ਮੂਹਰੇ ਜੋ ਪਾਵੇ ਨਿੱਤ ਬੇਖੌਫ ਪਟਾਕਾ

ਕੋਤਵਾਲ ਦੀ ਬੁੱਕਲ਼ ਬਹਿ ਜੋ ਲੱਚਰ ਨਾਅਰੇ ਲਾਉਂਦਾ

ਨਹੀਓਂ ਲੱਗਦਾ ਕਦੇ ਵੀ ਇਹ ਤੇਰੀ ਭੈਣ ਦੀ ਅਣਖ ਬਚਾਉਂਦਾ

ਗੁੰਡਿਆਂ ਦੇ ਜਿਸ ਝੁਰਮਟ ਤੇ ਤੂੰ ਬੈਠਾ ਆਸਾਂ ਲਾਈ

ਬਣ ਮਲੇਛ ਜੀਹਨਾਂ ਨੇ ਹਰ ਤਹਿਜ਼ੀਬ ਹੈ ਬੈ ਕਰਵਾਈ

ਤੇਰੇ ਨਾਮ ਤੇ ਜ਼ੁਲਮ ਕਰੇ ਜੋ ਤੇਰਾ ਧਰਮ ਬਚਾਉਂਦਾ

ਹਰਗਿਜ਼ ਨਹੀਂ ਤੂੰ ਧੀ ਅਪਣੀ ਦਾ ਓਹਨੂੰ ਹੱਥ ਫੜਾਉਂਦਾ

ਜਿਸ ਕੂੜੇ ਨੂੰ ਅੱਖਾਂ ਮੀਚੀ ਬੈਠਾਂ ਜੱਫੀ ਪਾਈ

ਹੱਕ ਹਕੂਕ ਦੂਜੇ ਦਾ ਲੁੱਟਦਾ ਵੇਖ ਜਾਵੇਂ ਮੁਸਕਾਈ

ਖੁੰਝਿਆ ਵਕਤ ਤੂੰ ਯਾਦ ਹੈ ਕਰਨਾ ਬਹਿ ਕੇ ਮੇਰੇ ਭਾਈ

ਤੇਰੇ ਵੀ ਅਰਮਾਨਾਂ ਦੀ ਜਦ ਇਨ੍ਹਾਂ ਰੇਲ ਬਣਾਈ

ਤਰਕ ਵਿਤਰਕ ਨਾ ਜੀਹਦੇ ਪੱਲੇ ਕਰੇ ਤੇਰੀ ਅਗਵਾਈ

ਬੁਲਡੋਜ਼ਰ ਦੀ ਜੀਹਨਾਂ ਦੇ ਹੱਥ ਤੂੰ ਹੈ ਵਾਗ ਫੜਾਈ

ਕਿਸ ਦਰ ਤੇ ਤੂੰ ਜਾ ਕੇ ਉਸ ਦਿਨ ਦਵੇਂਗਾ ਫੇਰ ਦੁਹਾਈ

ਜਿਸ ਦਿਨ ਤੇਰੀ ਖਾਤਿਰ ਇਹ ਲਗੌੜ ਦੀ ਪਲਟਣ ਆਈ

ਮੇਰਾ ਮਕਸਦ ਨਹੀਂ ਹੈ ਕੋਈ ਵਾਦ ਵਿਵਾਦ ਕਰਨ ਦਾ

ਵੇਲ਼ਾ ਖੁੰਝਿਆ ਜਾਂਦਾ ਅਦਬ ਆਦਾਬ ਅਮਨ ਦਾ

ਮੇਰੀ ਜੇ ਇਹ ਜਿਰ੍ਹਾ ਤੈਨੂੰ ਲੱਗਦੀ ਕਿਚ ਕਿਚ ਪਾਈ

ਹਰ ਰਿਸ਼ਤੇ ਤੋਂ ਮੈਨੂੰ ਦੇ ਦੇ ਬੇਦਾਵਾ ਮੇਰੇ ਭਾਈ

************************

 

ਤਾਰਾਂ

April 2023

 

ਆਖ ਦਿਓ ਕੋਈ ਜਾ ਕੇ ਮਨ ਦੀ ਬਾਤ ਇਹ ਯਾਰਾਂ ਨੂੰ

ਛੇੜ ਕੇ ਲੰਘਦੀ ਯਾਦ ਅਜੇ ਵੀ ਦਿਲ ਦੀਆਂ ਤਾਰਾਂ ਨੂੰ

ਸੂਦ ਹੀ ਨਾ ਕਦੇ ਮੁੜਿਆ ਸਾਥੋਂ ਕੌਲ ਕਰਾਰਾਂ ਦਾ

ਦੂਣ ਸਵਾਏ ਵਧਦਾ ਕਰਜ਼ਾ ਹੈ ਦਿਲਦਾਰਾਂ ਦਾ

ਮੋੜ ਲਿਆਵੋ ਸਾਡੀਆਂ ਵਿਸਰੀਆਂ ਮਸਤ ਬਹਾਰਾਂ ਨੂੰ

ਆਖ ਦਿਓ ਕੋਈ ਜਾ ਕੇ ਮਨ ਦੀ ਬਾਤ ਇਹ ਯਾਰਾਂ ਨੂੰ

ਛੇੜ ਕੇ ਲੰਘਦੀ ਯਾਦ ਅਜੇ ਵੀ ਦਿਲ ਦੀਆਂ ਤਾਰਾਂ ਨੂੰ

ਕੋਈ ਤਾਂ ਮੰਗੋ ਲੇਖਾ ਸਾਥੋਂ ਪਿਆਰ ਉਧਾਰਾਂ ਦਾ

ਦੌਰ ਚਲਾਵੋ ਆ ਕੇ ਫਿਰ ਅੱਲ੍ਹੜ ਤਕਰਾਰਾਂ ਦਾ

ਯਾਦ ਕਰਾਈਏ ਇੱਕ ਦੂਜੇ ਦੀਆਂ ਅੱਲਾਂ ਛੇੜਾਂ ਨੂੰ

ਆਖ ਦਿਓ ਕੋਈ ਜਾ ਕੇ ਮਨ ਦੀ ਬਾਤ ਇਹ ਯਾਰਾਂ ਨੂੰ

ਛੇੜ ਕੇ ਲੰਘਦੀ ਯਾਦ ਅਜੇ ਵੀ ਦਿਲ ਦੀਆਂ ਤਾਰਾਂ ਨੂੰ

ਨਾਂ ਇੱਕ ਜ਼ਾਤ ਨਾ ਧਰਮ ਨਾ ਰਿਸ਼ਤਾ ਸਾਡਾ ਕੁੱਖਾਂ ਦਾ

ਫੇਰ ਵੀ ਗੰਢ ਲਿਆ ਅਸਾਂ ਨਾਤਾ ਸਕੇ ਭਰਾਵਾਂ ਦਾ

ਕਿੰਜ ਸਮਝਾਵਾਂ ਤੱਲਕ ਧਰਮ ਦੇ ਠੇਕੇਦਾਰਾਂ ਨੂੰ

ਆਖ ਦਿਓ ਕੋਈ ਜਾ ਕੇ ਮਨ ਦੀ ਬਾਤ ਇਹ ਯਾਰਾਂ ਨੂੰ

ਛੇੜ ਕੇ ਲੰਘਦੀ ਯਾਦ ਅਜੇ ਵੀ ਦਿਲ ਦੀਆਂ ਤਾਰਾਂ ਨੂੰ

********************************

 

ਮੇਰਾ ਗੋਬਿੰਦ

April 2022

 

ਨਾ ਕੋਈ ਆਖੋ ਮੀਰਾ ਮੈਨੂੰ

ਨਾ ਕੋਈ ਰਾਣੀ ਰੁਕਮਣੀ

ਮੇਰਾ ਕ੍ਰਿਸ਼ਨ ਘਨੱਈਆ ਗਵਾਲਾ

ਮੇਰਾ ਗੋਬਿੰਦ ਮੱਖਣ ਚੋਰ

ਨਾ ਮੇਰਾ ਗੋਬਿੰਦ ਗੋਰਾ ਚਿੱਟਾ

ਨਾ ਮੇਰਾ ਗੋਬਿੰਦ ਨਵਾਂ ਨਕੋਰ

ਮੈਲ਼ਾ ਕਾਲ਼ੀ ਚਮੜੀ ਵਾਲ਼ਾ

ਮੇਰਾ ਗੋਬਿੰਦ ਘਟਾ ਘਣਘੋਰ

ਨਾ ਓਹ ਰਾਜਾ ਨਾ ਪਰਤਾਪੀ

ਨਾ ਕੋਈ ਕੂਟਨੀਤ ਵਿਦਵਾਨ

ਨਾ ਓਹ ਯਮ੍ਹਲਾ ਨਾ ਓਹ ਕਮਲ਼ਾ

ਮੇਰਾ ਗੋਬਿੰਦ ਆਦਮ ਆਮ

ਨਾ ਉਹ ਯੋਧਾ ਚੱਕਰਧਾਰੀ

ਨਾ ਕੋਈ ਦੇਵ ਲੋਕ ਅਵਤਾਰੀ

ਭੋਲ਼ਾ ਨਟਖਟ ਕੁਝ ਮੂੰਹਜ਼ੋਰ

ਮੇਰਾ ਗੋਬਿੰਦ ਇਲਤ ਕਿਸ਼ੋਰ

ਨਾ ਓਹ ਵਿਸ਼ਨੂ ਨਾ ਓਹ ਬ੍ਰਹਮਾ

ਨਾ ਓਹ ਆਖੇ ਗਾਂ ਨੂੰ ਅੰਮਾ

ਨਾ ਓਹ ਈਸਾ ਨਾ ਓਹ ਮੂਸਾ

ਮੇਰਾ ਗੋਬਿੰਦ ਯਾਰ ਸੁਦਾਮਾ

ਨਾ ਓਹ ਜਾਹਲ ਨਾ ਆਚਾਰੀ

ਨਾ ਕੋਈ ਸੁਲਝਿਆ ਸੱਭਿਆਚਾਰੀ

ਨਾਂ ਓਹ ਅਹਿਮਕ ਨਾਂ ਵਿਦਵਾਨ

ਮੇਰਾ ਗੋਬਿੰਦ ਕਿਰਤੀ ਕਿਸਾਨ

ਨਾ ਓਹ ਹਿੰਦੂ ਨਾ ਓਹ ਮੁਸਲਿਮ

ਨਾ ਕਿਸੇ ਸਿੱਖੜੇ ਦੀ ਸੰਤਾਨ

ਨਾਂ ਓਹ ਦਾਤਾ ਨਾ ਸੁਲਤਾਨ

ਮੇਰਾ ਗੋਬਿੰਦ ਹੈ ਇਨਸਾਨ